Рыцар чырвонага трактара "Беларус"
У першы дзень студзеня новага 2022 года калектыў Клічаўскага краязнаўчага музея аддае дань памяці і павагі свайму земляку Грузду Марату Дзмітравічу, ураджэнцу вёскі Турэц, з нагоды 90-годдзя з дня нараджэння.
Яшчэ пры жыцці яго называлі “рыцарам чырвонага трактара “Беларусь” Мінскага трактарнага завода, з якім ён звязаў свой лёс у 18 год. Больш 30 год працаваў трактарыстам-выпрабавальнікам новых машын.
Марат Грузд – жывая гісторыя беларускага трактарарабудавання. Ён удзельнічаў у стварэнні 9 мадэлей сусветна вядомага трактара. За стварэнне мадэлі МТЗ-50 у 1971 годзе яму прысуджана званне Лаўрэата Дзяржаўнай прэміі СССР. З вучэбным перасоўным класам МТЗ скалясіў 15 краін Еўропы, Азіі, Афрыкі.
У фондах Клічаўскага раённага музея захоўваецца асабісты комплекс рэчаў Грузда М.Дз.: дыплом і нагрудны знак Лаўрэата Дзяржаўнай прэміі СССР, ганаровыя граматы і дыпломы, фотаздымкі, памятны медаль, мадэль трактара “Беларусь”.
Самай дарагой узнагародай для Грузда стаў самаробны дыплом, намаляваны сынам нарвежскага фермера “за отличную пропашку каменистой норвежской земли в Халлингдале”.
У 1980-я гады беларускі трактар быў прызнаны адным з самых надзейных у свеце. Гэта падцвердзіла перамога мадэлі МТЗ-80 на выпрабаваннях у штаце Нябраска Злучаных Штатаў Амерыкі. Усе міжнародныя паказчыкі былі ім перакрыты. Сярод тых, хто рыхтаваў машыну да гэтых адказных іспытаў, быў і Марат Грузд.